SOKO LA MAKAMBAKO LATISHA KWA UCHAFU BEST FM LALIVALIA NJUGA.

 

 

Na: McDonald Mollel Masse-Makambako

 

Uchafu umekithiri katika soko la nyanya Makambako ambapo kunamrundikano mwingi wa nyanya zilizooza upande wa mashariki wa soko ukiachana na uchafu mwingine mdogomdogo ndani ya soko. Kutokana na uchafu huo imepelekea kuwepo kwa harufu mbaya eneo hilo la soko na hivyo watu kuteseka kwa harufu hiyo kali iliyoko katika eneo hilo la soko.

Kwa kile kinachoonekana kuwa ni uzembe wa viongozi wa eneo hilo katika kushughulikia tatizo hilo uchafu huo umedumu kwa muda mrefu pasipo jitihada zozote kufanyika na viongozi ili kutatua tatizo hilo licha ya wananchi na hasa wafanyabiashara wa soko hilo kulalamika mara kwa mara kwa kuuomba uongozi ufanye taratibu za usafi .

Hofu kubwa iliyoko kwa wananchi na wakazi wa eneo hilo ni uwezekano wa kutokea kwa magonjwa ya mlipuko na hasa kwa njia ya hewa  ambapo miongoni mwa waathirika wakubwa wanaweza kuwa wanafunzi wa shule ya msingi ya Maendeleo ambao shule yao iko jirani sana na soko hilo upande huo huo wa mashariki mwa soko kwenye mrundikano wa taka.

Hatari zaidi iko kwa watoto ambao hufika katika eneo hilo lenye harufu mbaya sana na kuokota nyanya zilizoharibika na kutupwa na wafanyabiashara kwa ajili ya kuziuza mtaani. Jambo hili linahatarisha maisha ya watoto ambao licha ya kukatazwa na kufukuzwa eneo hilo hutumia kila mbinu waweze kuokota nyanya wakaziuze na hasa ikizingatiwa kwamba wengi wao huwa ni watoto wa mtaani hivyo hutegemea njia hiyo pekee ili waweze kuendesha maisha yao.

Kutokana na tatizo hilo kulalamikiwa na wananchi wengi wa Makambako hasa wakazi wa eneo hilo na wafanyabiashara wa soko hilo sasa suala hilo limevaliwa njuga na Redio Best FM ambapo kupitia kipindi cha Morning Talk wanafanya kila liwezekanalo kwa kuwatafuta viongozi husika waweze kutoa ufafanuzi wa jambo hilo. Licha ya jitihada hizo za Best FM inaonyesha wazi kwamba viongozi hao wamekuwa wakikwepa kuongea na redio hiyo live kutoa ufafanuzi wa uchafu huo uliokithiri sokoni.

Wakiongea na mtandao huu wa Makambako Kwetu, wananchi wa Makambako wakazi wa mtaa wa Mjimwema eneo la soko wamelalamika sana kukithiri kwa uchafu eneo la soko la nyanya ambapo wameeleza kwamba kila wapitapo eneo hilo hulazimika kufunga pua zao kutokana na harufu mbaya iliyoko eneo hilo. Pia wameeleza kufurahishwa na kupongeza jitihada za redio Best FM katika kulishughulikia tatizo hilo wakiamini kwamba tatizo hilo litakwisha kwani ni matatizo mengi yametatuliwa kupitia jitihada za redio hiyo.

Pia wameiomba serikali ya kitongoji cha Mjimwema ambayo hata ofisi za kitongoji ziko eneo jirani sana na soko hilo umbali usiozidi Mita 250 kulishughulikia tatizo hilo ili kutatua adha wazipatazo wananchi na wafanyabiashara wa soko hilo.

ZANZIBAR KWALIPUKA WABARA WATAKIWA WAONDOKE

Moto ukiwaka katikati ya mtaa mjini Zanzibar jana baada ya vurugu za wanaharakati kupinga muungano na kudai Zanzibar ijitawale.



ZANZIBAR imechafuka. Baada ya kuwapo kwa amani kwa takribani mwaka mmoja tangu kuundwa kwa Serikali ya Umoja wa Kitaifa Zanzibar, vurugu na hali ya wasiwasi zimeibuka tena baada ya wanaharakati wa Kiislam kufanya maandamano kutaka uhuru wa visiwa hivyo.
Zanzibar ilijikuta katika hali tete kiusalama tangu mwaka 1995 baadaya kutangazwa matokeo ya uchaguzi mkuu wa Rais, ambayo Chama cha Mapinduzi (CCM) kiilibuka kidedea na Chama cha Wananchi (CUF) kupinga, lakini uhasama huo ulizikwa Julai 31 mwaka 2010, baada ya kura ya maoni ya kuunda Serikali hiyo ya umoja wa kitaifa.

Lakini kuanzia juzi usiku hadi jana jioni mji wa Unguja na viunga vyake ulitikiswa na mabomu ya kutoa machozi ambayo polisi waliyatumia kutawanya mamia ya wanaharakati hao wa Kiislam wakiongozwa na Jumuiya ya Uamsho na Mihadhara ya Kiislamu Zanzibar (JUMIKI).

Mabomu ya machozi yalipigwa mfululizo juzi usiku na kuendelea kutwa nzima jana, hivyo kuathiri shughuli za biashara, ibada katika makanisa mbalimbali na kusababisha hofu kwa wananchi.

Kwa muda wa saa takriban mbili hivi kati ya saa 3:00 na saa 5:00 asubuhi, helkopta ya polisi ilikuwa ikipasua anga la Zanzibar ambalo lilikuwa limetandwa na moshi uliotokana na mabomu ya machozi pia uchomaji wa matairi ya magari. 
Kamishna wa Jeshi la Polisi Zanzibar, Mussa Ali Mussa aliwaambia waandishi wa habari kuwa wafuasi hao wamefanya uharibifu mkubwa ikiwa pamoja na kuchoma moto makanisa mawili na kwamba, watu saba akiwamo Imamu wa Msikiti wa Bizeredi, Maalim Mussa Juma wanaotuhumiwa na matukio hayo wamekamatwa na jeshi hilo.

Akizungumza na Mwandishi wa habari hizi Kiongozi wa Kanisa la Tanzania Assemblies of God (TAG), Askofu Dickoson Maganga alisema watu wasiojulikana walivamia kanisa lao eneo la Kariakoo Mjini Zanzibar mnamo saa 4.30 usiku na kuvunja ukuta, kuchoma viti vya plasitiki pamoja na gari yake.

Chanzo cha vurugu hizo kinatajwa kuwa ni wanaharakati hao juzi kufanya mkusanyiko na maandamano makubwa ya kushtukiza ambayo yalizistua mamlaka za usalama visiwani humo, lakini baada ya kutawanyika jioni baadhi ya viongozi wa maandamano hayo walitiwa mbaroni.

Baada ya kukamatwa kwao, wafuasi wao walikusanyika makao makuu ya polisi Mkoa wa Mjini Magharibi, Madema, kushinikiza kutolewa kwa viongozi hao wanaoshikiliwa kituoni hapo.

Habari zaidi zinasema kutokana na hali ilivyo, askari polisi walitarajiwa kuongezwa visiwani humo, ili kusaidia kuimarisha hali ya usalama pia kuwadhibiti wahalifu ambao walikuwa wameanza kuelekea nje ya maeneo ya mji.

Tayari kuna taarifa kuwa askari wa Jeshi la Ulinzi la Wananchi wa Tanzania (JWTZ) kutoka Tanzania bara jana mchana walingia Zanzibar kwa ajili ya kuongeza ulizi katika mji wa Unguja.

Hata hivyo, katika hali ya kushangaza hakuna kiongozi yoyote wa Serikali ya Mapinduzi ya Zanzibar (SMZ) aliyetoa kauli kuhusu hali hiyo.

Kauli ya Polisi
Kamishna Mussa alisema jeshi lake litaendelea kuwasaka na kuwatia mikononi wote waliopanga fujo hizo pamoja na viongozi wote wa JUMIKI.

“Jumuiya ya Uamsho na Mihadhara ya Kiislamu Zanzibar ndio iliyohusika na kuwachochea vijana kukusanyika na kufanya uharibifu ikiwemo kuchoma moto gari, kupanga mawe barabarani na kufanya hujuma mbalimbali kinyume cha sheria. Tutaendelea kuwasaka kwa gharama zote,” aliapa Kamishna Mussa.

Alifafanua kwamba kwa sasa mikusanyiko yote ya mihadhara ya kidini na vyama vya siasa, lazima ipate kibali cha polisi vyinginevyo jeshi lake litatumia nguvu za ziada kutawanya mikusanyiko hiyo ili kulinda sheria za nchi, amani na utulivu.

Hata hivyo, kamishna huyo wa polisi alijizuia kuhusisha harakati za Uamsho na chama cha siasa wala kutaja majina ya viongozi ambao tayari wanashikiliwa na jeshi lake.

“Mpaka sasa hivi sina majina yao kwa jumla, lakini tumewakamata viongozi wa Uamsho na tunatendelea kuwasaka lakini jina moja tu ndio ninalo ambalo ni Mussa Abdallah Juma,” alisema Kamishna huyo.

Hali bado tete
Wakati jeshi la polisi litoa onyo hilo, hali ya usalama ilionekana kuwa bado tete huku maeneo kadhaa ya Mji wa Zanzibar hasa Darajani na Michenzani ambako muda wote ni sehemu zenye harakati nyingi za biashara, jana zilikuwa zimebakia bila pilikapilika kutokana na askari waliojihami kufanya doria katika mitaa yote na kulipua mabomu kila penye kikundi cha watu waliokusanyika wakinywa kahawa.

Mitaa hiyo ilikuwa imechafuliwa kwa mawe, matofali na magogo yaliowekwa barabarani ili kuziba njia kwa ajili kuzuia magari yasipite huku mipira ya magari ikiwashwa moto na vijana hao.

Kwa upande wake Askofu Maganga akizungumzia uvamizi kisha uhalifu uliofanywa kanisani kwake alisema:
“Nasikitika sana kwa tukio hili ambalo tayari tumeiarifu polisi ambao jana (juzi), usiku walifika hapa wakishirikiana na kikosi cha kuzima moto na kufanikiwa kuuzima moto huo ambao kwa habati nzuri haujaathiri paa la kanisa letu,” alishukuru kiongozi huyo.

Alisema kundi la watu ambalo lilikuwa likitoa maneno ya kashfa na kutishia maisha ya waumini waliokuwa wakifanya ibada usiku huo, lilikatisha ibada hiyo pamoja na kusababisha uharibifu wa mali ya kanisa hilo yenye thamani ya zaidi ya Sh 100 millioni.

Kauli ya JUMIKI
Kutokana na hali hiyo, jumuiya hiyo jana ilitoa taarifa yake kwa vyombo vya habari ikikanusha kuhusika na kuchochea watu kuchoma kanisa wala kuharibu mali za watu.

Hata hivyo, Katibu wa Jumuiya hiyo, Abdallah Said alisema katika taarifa hiyo kwamba jeshi la polisi linapaswa kubeba lawama kwa yote yaliotokea kutokana na kuvunja sheria na kuwakamata viongozi bila ya utaratibu wa busara.

“Uislamu ni dini ya amani na inahimiza ushirikiano na utulivu na hatuwezi kuwatuma watu kwenda kuvunja makanisa na kuharibu mali, kwa sababu ndani ya imani zetu tunajua hilo ni kosa na jambo ambalo halifai katika maamrisho ya dini yetu,” alisema Sheikh Abdallah.

Taarifa hiyo ilisema pia kwamba jumuiya hiyo imekuwa wazi katika kudai maslahi ya Zanzibar na sio vinginevyo na kuahidi kufanya hivyo kwa njia za amani, na iwapo watakuwa wamekosea basi wapo tayari kufikishwa katika vyombo vya sheria.

“Ni lazima polisi wajue kwamba tupo tayari kufanya kazi kwa misingi ya kisheria na hata kwa kujisalimisha tupo tayari, lakini ukamataji bila kufuata busara na sheria haukubaliki. Tunachokitaka ni kura ya maoni haraka na hilo tutaendelea kulidai,” alisisitiza katibu huyo wa JUMIKI.

Wakati viongozi wa Uamsho wakiendelea kutafutwa na jeshi la polisi, nyumba ya kiongozi aliyeongoza maandamano juzi Sheikh Farid Hadi Ahmed inadaiwa kuvunjwa milango usiku wa manane alipokuwa akiswakwa jeshi hilo.

Hata hivyo, taarifa hizo hazikuthibitishwa iwapo ni polisi waliofanya kitendo hicho au la,  wanafamilia wanasema waligongewa milango na kutakiwa wafungue baada ya kutofungua walisikia kishindo kikubwa cha kusukumwa milango katika eneo la Mbuyuni Mjini Unguja.

Vijana katika mitaa ya Zanzibar jana walionekana wakiwa na hamasa kubwa wakidai kuendelea kuungana na viongozi wao kudai haki ya Zanzibar, pamoja na kutaka Zanzibar huru kutoka ndani ya mikono ya Muungano.

“Sisi tunachokitaka Zanzibar yetu watupige mabomu, watuue, watukamate lakini tunataka Zanzibar yetu na hatusikii lolote,” walisikika baadhi ya vijana.

Hada jana jioni vurugu katika badhi ya maeneo hususan Kwelekwe na njia ya Baa ya Amani zilikuwa zikiendelea na gari moja lilichomwa moto karibu na ofisi ya CCM.

Matukio kabla
Zanzibar imekuwa ikitawaliwa na matukio ya ghasia ambayo licha ya mihadhara hiyo ya Kiislam ilikuwa ni uhasama wa kisiasa kati ya vyama vikuu vya CUF na CCM, hatua ambayo iliwahi kusababisha mauaji ya Januari 27, mwaka 2001.

Lakini, uhasama huo wa kisiasa ambao ni wa kihistoria ulizikwa baada ya kura hiyo ya maoni na uchaguzi mkuu wa 2010 hatua ambayo imemfanya Katibu Mkuu wa CUF, Maalim Seif Sharrif Hamad kuwa Makamu wa Kwanza wa Rais wa SMZ huku baadhi ya mawaziri pia wakitoka katika chama hicho.

Hata hivyo, wanaharakati hao wa Kiislam wameanza upya kuilipua Zanzibar wakishinikiza visiwa hivyo viwe taifa huru kwa kujitenga katika Jamhuri ya Muungano wa Tanzania.

Zitto ataka tume ya uchunguzi
Katika hatua nyingine Mbunge wa Kigoma Kaskazini, Zitto Kabwe amemtaka Rais wa Zanzibar, Dk Ali Mohamed Shein aunde kikosi kazi maalum kwa ajili ya kudhibiti
vurugu hizo na kuanza mazungumzo na pande zote kwa kuwa, "Hiki sio kitendo cha kudharau
kabisa."

Alifafanua kwamba waliochoma nyumba za ibada wasakwe na kufikishwa mbele ya sheria mara
moja na kuongeza, "Tusiruhusu hata kidogo wapuuzi wachache kutuingiza katika vurugu za
kidini ili kufikia malengo yao ya kisiasa."

mwisho

Mkereketwa

VYAMA vya upinzani wilaya ya Ludewa na mkoa wa Iringa vimeungana na wapiga kura wa jimbo la Ludewa mkoa mpya wa mkoani Njombe kufanya mapokezi makubwa ya kihistoria kwa mbunge wa jimbo la Ludewa Deo Filikunjombe (CCM) wananchi na vyama vya upinzini katika jimbo hilo wakitoa msimamo mzito kwa chama cha mapinduzi (CCM) kuwa iwapo kitajaribu kumfanyia mizengwe mbunge huyo kwa hatua yake ya aliyoifanya mbunge Dodoma kwa kusaini fomu ya kutokuwa na imani ya waziri mkuu Mizengo Pinda basi jimbo watalikosa.

Wapiga kura hao wa jimbo la Ludewa ambao waliungana na vyama vya TLP ,CUF,NCCR Mageuzi pamoja na wana CCM katika mandamano makubwa yaliyoanzia umbali wa zaidi ya kilometa 10 hadi mjini Ludewa huku mbunge Filikunjombe akitumia usafiri wa punda ,walitoa kauli hiyo leo katika mkutano wa hadhara uliofanyika viwanja vya michezo vya Ludewa mjini.

Akizungumza kwa niaba ya vyama vya upinzani katika mkutano huo katibu mwenezi wa TLP mkoa wa Iringa Branka Haule alisema kuwa uamuzi wa mbunge huyo Filikunjombe wa kuweka sahihi katka fomu iliyoandaliwa na mbunge Zitto Kabwe (Chadema) kuhusiana na kutokuwa na imani ya waziri mkuu kutokana na baadhi ya mawaziri wake kufanya ufisadi wa kutisha ,ni uamuzi uliopokelewa kwa furaha kubwa na watanzania wote pasipo kujali itikadi zao za kisiasa .

Hivyo alisema wao kama vyama vya upinzani wanaungana na hatua ya mbunge Filikunjombe na wabunge wote waliopinga vitendo vya ufisadi na utendaji mbovu wa mawaziri waliotemwa katika baraza jipya lililoundwa baada ya wabunge kutangaza kutokuwa na imani na waziri mkuu Pinda .

Haule alisema wao kama TLP na vyama vyote vya upinzani ambavyo vinapinga vitendo vya ufisadi wataendelea kutoa ushirikiano kwa mbunge Filikunjombe katika jimbo hilo la Ludewa na kutokana na hatua ya mbunge huyo kuonyesha uzalendo kwa umma bila kuangalia chama chake cha CCM wao wataendelea kumuunga mkono hata katika uchaguzi mkuu ujao na iwapo CCM itajaribu kumfanyia fitina basi watakuwa tayari kumuunga mkono popote atakapo kwenda .

Viongozi wa upinzani walioshiriki maandamano hayo ni mbali ya Haule ni pamoja na kampeni meneja mkuu wa mkoa kupitia TLP mkoa wa Iringa Mrisho Samson , mwenyekiti wa NCCR Mageuzi wilaya ya Ludewa ,Lazaro Mwinuka , Mwenyekiti wa CUF wilaya ya Ludewa Asungushe Mtweve, Katibu mwenezi wa TLP wilaya , Bariki Pangisa , katibu wa wilaya ya Ludewa TLP ,Joseph Kayombo na katibu wa CUF wilaya ya Ludewa Edwin Mgimba huku viongozi wa Chadema wilaya hiyo wakishiriki wakiungana na wananchi katika mkutano na kugoma kutambulishwa .

Kwa upande wa CCM walioshiriki ni pamoja na makamu mwenyekiti wa Halmashauri ya Ludewa Monica Mchilo, katibu mwenezi wa CCM mkoa Mgaya pamoja na mwenyekiti wa CCM wilaya na madiwani .

Kwa upande wao wananchi wa jimbo la Ludewa katika risala yao iliyosomwa na Casta Mbawala walisema kuwa wataendelea kumuunga mkono mbunge huyo popote atakapokuwa akitetea maendeleo ya Taifa bila kujali itikadi zao za kisiasa .

Akiwahotubia wananchi hao mbunge Filikunjombe mbali ya kuwapongeza kwa mapokezi makubwa aliyopata bado alisema kuwa ataendelea kupigania maendeleo ya wilaya ya Ludewa na Taifa kwa ujumla .

Alisema kuwa mjadala katika Bunge liliopita juu ya ripoti za Mdhibiti na Mkaguzi Mkuu wa Hesabu za Serikali (CAG) pamoja na taarifa za mwaka za Kamati za Kudumu za Bunge za Hesabu za Serikali, Serikali za Mitaa na Mashirika ya Umma unaonyesha ni namna gani vitendo vya kifisadi vya viongozi wetu waandamizi vinazuia utekelezaji wa Ilani ya Uchaguzi ya CCM ya 2010 kama tulivyoahidi kwa watanzania.

“Ndugu wananchi wenzangu, nikiwa mle bungeni, tukiwa tunaijadili ripoti ya Mkaguzi Mkuu wa Serikali, inayoonyesha ubadhirifu mkubwa katika fedha za umma; ghafla mawazo yangu yalihama kutoka bungeni yakaja katika vijiji vyetu vya Ludewa, Mavanga, Lusala, Lumbila, na kadhalika. Kitu kama mshale wenye ncha kali wa moto uliuchoma moyo wangu.”

Filikunjombe alisema kuwa alikumbuka mateso makubwa wanayopata wananchi wake na ndio sababu akaumia sana .

“Wakati baadhi ya Mawaziri, wanatumia nafasi zao kujineemesha, nilikumbuka jinsi mwananchi wa Ludewa anavyotaabika kwa miundombinu duni. …Nilikumbuka jinsi tulivyo na bara bara mbovu. Nilikumbuka jinsi mwananchi wa Ludewa anavyocheleweshewa kuletewa Pembejeo za Kilimo. Nilikumbuka jinsi mwananchi wa Ludewa anavyoletewa mbegu za kupandia mwezi wa pili wakati msimu wa kupanda mahindi ni mwezi Novemba”alisema

“Nilikumbuka Jinsi mawakala wa Pembejeo wanavyokopwa mbolea na serikali yetu, na hakuna kauli maalum inayotolewa. Nikaumia sana…. Nilikumbuka namna wanafunzi wa Ludewa wanavyosoma katika mazingira duni, wamekaa chini, walimu hawatoshi, madarasa hayatoshi, nyumba za walimu hazitoshi. Nilikumbuka namna sekondari zetu zinavyokosa maabara. Nilizidi kuumia moyoni mwangu.” “Kwa niaba yenu ninafarijika kwamba Mhe. Rais ameshaanza kuchukua hatua za kuwawajibisha wahusika. Wito wangu kwake Mheshimiwa Rais ni kwamba asiishie tu kuwawajibisha tu wahusika bali ni lazima pia wafikishwe mahakamani ikiwa ni pamoja na kufilisiwa mali zao walizozipata kwa njia ya kifisadi.” Alisema kuwa Chama Cha Mapinduzi kinachafuka kwa sababu tu ya kuwakumbatia watu wachache wanaofanya wasiowaaminifu na mafisadi ambao sio Sera ya CCM na wala siyo malengo wala madhumuni kwa mujibu wa Katiba ya chama chetu. “Vita tuliyoianzisha ya kukomesha ubadhilifu, wizi, matumizi mabaya ya madaraka na rushwa ni vita takatifu ambayo kila mmoja wetu anatakiwa kushiriki kwa eneo lake, silaha yetu kubwa ikiwa ni ukweli, haki na ujasiri. Kamwe, msidhani sisi tuliosimama mle bungeni kuwasema wale mawaziri wetu kwamba tunawachukia. Hapana. Bali ukweli ni kwamba kwenye hili ninawapenda zaidi wana Ludewa, na tunalipenda sana Taifa letu kuliko tunavyowapenda wao”. Na McDonald Mollel Masse-Ludewa

PATA MATUKIO YA KILA SIKU KUTOKA LUDEWA YETU.